YAJUE MAAJABU YA NDIZI MBIVU

YAJUE MAAJABU YA NDIZI MBIVU

NDIZI mbivu ni tunda linalofahamika na kila mtu, lakini sina hakika kama watu wote wanafahamu umuhimu na faida za tunda hili ambalo linapatikana kirahisi sana nchini.

Kama ulikuwa hujui umuhimu na faida za ndizi mbivu mwilini, naomba usome makala haya na baada ya kusoma naamini utakuwa na mtizamo tofauti kuhusu tunda hili.

KINGA DHIDI YA SHINIKIZO LA DAMU NA MARADHI YA MOYO
Kwa mujibu wa utafiti wa kisayansi kuhusu tunda hili, ndizi ni chanzo kikubwa cha madini aina ya ‘Potassium’, ambayo ni muhimu sana katika kuweka shinikizo la damu mwilini katika hali yake ya kawaida (Normal Blood Pressure), na huboresha utendajikazi mzuri wa moyo. Ndizi moja tu kwa siku inaweza kukukinga na maradhi ya shinikizo la damu na matatizo ya moyo.

Ukweli kuhusu vyakula vyenye kiwango kikubwa cha madini ya ‘Potassium’ katika kushusha shinikizo la damu mwilini, umethibitishwa na tafiti nyingi za kisayansi. Kwa mujibu wa jarida moja la masuala ya afya nchini Marekani, zaidi ya Wamarekani 40,000 wa kike na kiume, walifanyiwa utafiti kwa muda wa miaka minne na ikagundulika kwamba watu wanaokula vyakula vyenye ‘Potassium’ na ‘Fiber’ (kambalishe), wamejiepusha na kupatwa na kiharusi.

KINGA DHIDI YA VIDONDA VYA TUMBO
Kwa muda mrefu imethibitishwa kwamba ndizi ina virutubisho vyenye uwezo wa kupambana na asidi tumboni hivyo kutoa kinga dhidi ya vidonda vya tumbo (Stomach ulsers) na kutoa ahueni kwa mtu ambaye tayari ameathirika. Katika utafiti mmoja, ilibainika kwamba mtu akila mchangayiko wa ndizi mbivu na maziwa huzuia utokaji wa asidi tumboni inayosababisha vidonda vya tumbo.

Kwa mujibu wa utafiti wa kisayansi juu ya suala hili, ndizi hutoa kinga na ahueni ya vidonda vya tumbo kwa njia mbili. Mosi: virutubisho vilivyomo kwenye ndizi huzipa uhai seli zenye kazi ya kutengeneza utandu ambao hutoa aina fulani ya urojo (mucus) unaotumika kama kizuizi dhidi ya asidi tumboni.

Hivyo kama wewe hujapatwa na vidonda vya tumbo, kwa kula ndizi mara kwa mara unajipa kinga madhubuti na kama tayari umeathirika na vidonda, kwa kula ndizi utajipa ahueni kubwa.

TIBA KWA WENYE MATATIZO YA CHOO
Ndizi ni muhimu sana katika kulainisha na kusafisha tumbo na kumuwezesha mtu kupata choo laini. Mbali ya kusaidia upatikanaji wa choo kwa wenye matatizo hayo, lakini pia hutoa ahueni kwa wagonjwa wa Kipindupindu. Mtu aliyepatwa na maradhi hayo hupoteza kiasi kikubwa cha madini ya ‘Potassium’, hivyo kwa kula ndizi ataweza kurejesha mwilini haraka madini yake yaliyopotea.

UIMARISHAJI WA NURU YA MACHO
Wakati ulipokuwa mdogo, bila shaka uliwahi kuambiwa na mama kuwa mtu akila karoti, atakuwa akiona vizuri. Bila shaka hakukosea, lakini sasa ukiwa mtu mzima unaambiwa kwamba ulaji wa matunda, ikiwemo ndizi ndiyo kinga hasa dhidi ya matatizo ya kutokuona vizuri uzeeni.

Ndizi hujenga kwenye utumbo mwembamba uwezo mzuri wa kunyonya madini ya ‘calcium’ na virutubisho vingine na hivyo kuwezesha virutubisho kuingia mwilini na kuzunguka katika mfumo wa damu bila matatizo.

Baadhi ya vitamini na madini yaliyomo kwenye ndizi ni pamoja na Vitamini B6, Vitamin C, ‘Potassium’, ‘Manganese’ na Fibre (kambalishe). Hivyo utaona kwamba tunda la ndizi ni muhimu kwa sababu limesheheni vitamini na madini muhimu katika mwili wa binadamu. Kuanzia leo itazame ndizi kama tunda muhimu sana katika ustawi wa afya yako. Ndizi pia hutia mwili nishati, unaposikia uchovu, kula ndizi moja na utajisikia mchangamfu.

 

Kwa ushauri zaidi tuwasiliane, pia matatizo yakizidi muone daktari kwa matibau zaidi.

story@moodyhamza